Langile bat eraila Olaberrian, urteko zazpigarrena gutxienez

Arcelor enpresaren Olaberriako lantokian zamalanetan ari zen garraiolari bat hil dute gaur. Ibilgailuak azpian hartu du behargina, eta bertan zendu da. 2013. urtean antzeko erailketa bat izan zen toki berean. 2020. urtea hasi zenetik, gutxienez zazpi langilek galdu dute bizia euren lanpostuetan.
Argazki Nagusia
Argazkia: @onkixen
2020ko urtarrilaren 22a

Gaur, hilak 22, langile bat erail dute Arcelor Mittal enpresak Olaberrian (Gipuzkoa) duen lantokian. Zamalanetan jarduten zuen 59 urteko garraiolariak, eta oraindik argitu ez dituzten arrazoiak medio, ibilgailuak azpian hartu du goizean. Hala, beste kamioi baten aurka zapaldu du, eta bertan zendu da.

LAB sindikatuak gogoan izan du, 2013. urtean, antzeko erailketa bat izan zela lantegi berean. Orduko hartan ere garraiolari bat hil zuten.

2020. urtea hasi zenetik, Euskal Herrian gutxienez zazpi langilek galdu dute bizia euren lanpostuetan.